Publicada o Domingo 31 de Decembro de 2006 en Deportes
O derradeiro fin de semana do 2006 estivo marcado polo deporte en Mugardos. Segundo comunica a Concellaría de Deportes, a tradicional Carreira Popular de Fin de Ano, organizada conxuntamente polos concellos de Ares e Mugardos o domingo 31 de decembro, e cuxo traxecto de dez quilómetros discorreu entre os dous municipios, reuniu 300 corredores, case que o dobre que a edición anterior. Ao rematar a proba sorteáronse dez cestas entre os participantes.
O concelleiro de Deportes mugardés, Evaristo Deus, amosou a súa satisfacción polo incremento notábel no número de participantes, “que vai na liña do que sucede coas demais actividades, tanto deportivas coma culturais, que estamos a organizar”, dixo.
O sábado 30, por outra banda, 500 persoas asistiron ás finais dos VII Encontros do Nadal de Fútbol V celebrados no Pavillón do Cristo. Houbo 190 participantes das categorías biberón, prebenxamín e benxamín, dos clubes Racing de Ferrol, SCDR Perlío, Numancia CF de Ares, Eume Deportivo e o anfitrión, Galicia de Mugardos.
