Publicada o Sábado 24 de Febreiro de 2007 en Xeral, Emprego
O Concello de Mugardos aprobou no Pleno celebrado este venres 23 de febreiro unha moción presentada polo BNG na que dá o seu respaldo ao proxecto da Consellaría de Innovación e Industria da Xunta de Galiza para reactivar o sector da construción naval na ría, e insta á Presidencia do Goberno do Estado a adoptar as medidas precisas para que os activos ociosos do estaleiro de Fene poidan ser desafectados pola SEPI e reincorporados á actividade, do mesmo xeito que acaba de acontecer en Xixón, Sestao e Sevilla, así como a presentar decontado o Plano Industrial para Ferrol previsto nos acordos de 2004.
A moción foi aprobada por 6 votos a favor (4 BNG, 2 non adscritos), 4 abstencións (2 PSOE, 1 PP, 1 IpM) e 2 en contra (1 IpM, 1 IU). O Parlamento de Galiza adoptou hai uns días unha resolución similar coa unanimidade dos tres partidos representados nel, PP, PSOE e BNG.
A realización dun proxecto destas características suporía un importante impulso para a economía de Ferrolterra e de Mugardos, e crearía ademais as condicións para o retorno de emigrantes que a día de hoxe se atopan traballando noutros lugares do Estado. Até non hai moito tempo, eran varios centos os mugardeses que traballaban directamente no sector da construción naval.
